بسم الله الرحمن الرحيم

من هنا سوف نبداء إنشاء الله تعالى في سرد كل ما يخص إنشاء مؤسسة مقاولات عامه لكي يستفيد منها الجميع ابتداءً من إستإجار المحل وإلى ما تطمحون إليه بإذن الله تعالى ( مدعومه بالصور ) وهذه الصفحه سويتها تظامن مع ( منتدى بطاله )

اول شي تروح للبلديه وتسئلهم عن مساحه المحل راح يقولك وش هو النشاط قوله مؤسسة مقاولات عامه وعاد هو راح يقول لك مثلا عندنا بمكه 24 متر ( مساحه المحل طول في عرض ) ويكون على شارع عام او تجاري وبعد ما تشوف المساحه من البلديه تشمر عن ثوبك وتنطلق تدور على محل بنفس المواصفات ويكون على حسب مقدرتك الماليه في ناس تبي رخيص وفيه ناس تبي تجخ وتبسط نفسها كل واحد حر في الي يشتهيه المهم بعد ما تحصل المحل المنشود حاول توصل لراعي البيت وتتفق معاه على أجار المحل والمبلغ المطلوب وبعد الاتفاق تروح انت وصاحب المحل على اقرب مكتب عقار وتسجلون ما بينكم على ورقه اسمها ( عقد اجار ) ولا تنسى تجيب رخصه المحل او ( البناء ) من صاحب البيت او المحل وبطاقه الاحوال لكلا الطرفين  وهذه صور تبين لكم الامر عند مكتب العقار





صوره لرخصه البناء







عقد اجار من مكتب العقار



وبعدين تقول لصاحب المحل الله لا يهينك المفاتيح ولا عاد اشوفك توطوط عند المحل ( امزح ) وتقول بسم الله وينك يالعفش ..

ملاحظة يفضل إختيار محل جاهز يعني اقصد باب المحل يكون سحاب ماهو حديد وتبتلشون مثلي في فتح المحل وإغلاقه لاني انا صارت لي عضلات من كثر ما افتح واصكر بها الباب ههههههههه وبعدها يا حلوين من بدري قبل المرمطه حط تجهيزات المحل يعني مثل : قزاز للمحل عاد فيه نوعين ( ألمنيوم او حق الصيدليات ) كل واحد على قد قروشه لا تبلشوني معاكم وطاوله وكرسي حق الكشخه وكم كرسي للضيوف والعملاء والاصدقاء ووووو إلخ مع الطاوله علشان القهوه والشاهي ( لا تشرب كل من هب ودب ) أنتم فاهميني طبعاً ودولاب يكون من رفين او ثلاثه على حسب ماديتك ومكيف ( لزوم الطراوه ) وبعدين خذ زوليه ( فرشه ) وحطها على الارض والسلام ختام وجيب لك لوحه على حسب مزاجك وصممها مثل ما تبي لان كل ما كبرت اللوحه صار عليها رسوم عند البلديه وراح يوضحها لك الموظف وقتها وبعدين خذ صوره للمحل من الخارج وتروح لمحل تصوير وتطبعها علشان تروح للبلديه وانت جاهز وهذه الصوره تبين لكم ( الطبعه تكون على كامل الورقه )

صوره محلي بعد الانتهاء ( الحمد لله )

...

خلصنا من المحل وأنتهينا ألحين جينا كما اسميتها أنا ( حرب داحس والغبراء ) كل واحد يحط في جيبه ما يلي : 

  1 - فلوس علشان التصوير ( اوراقك ومستنداتك ) والبنزين والدخان ( كرز ) وبطايق الشحن او سدد فاتاورتك من بدري احسن لك و ( ساهر ) وانتبهو لانفسكم وكل واحد يصلي علشان لما تموت تكون ميت على ( الإسلام إن شاء الله )

 2 - بندول إكسترا او شي يروق الحاله الي راح تكون فيها ( لحد يفهمني غلط )

 3 - بلاك بيري او لعبه تشغلك وقت الانتظار والمراجعات

يالله بسم الله تنطلق على البلديه من بدري الساعة 7 صباحا وانت عند بابهم وتقول هذا الدعاء انصح الجميع فيه

( اللهم اكفنيهم بما شئت وكيف شئت إنك على كل شي قدير ) وراح تشوف مفعوله على طول ولا تنسونه تراهم اهم من كل شي

وتاخذ رقم وتنتظر رقمك وبعد وصول رقمك تنط على الموظف واعطيه هذه الاوراق ( صوره البطاقه + رخصه المحل + عقد الاجار + صوره المحل من الخارج ) وخذ بطاقه الاحوال معاك الاصل لزوم يتفرجون بخشتك وعاد تجيك الدردشه وش ناوي قوله مؤسسة مقاولات عامه وهو بيقول لك هات الاوراق وبطاقه الاحوال ويقعد يناظر فيها ويتفحصها وياخذ له كاسه شاهي وبعدين يرجع يتفرج فيها وبعد ما يخلص راح يطلع لك ورقه اسمها ( إستمارة رخصه محل ) وراح يعبيها ويسئلك وين المحل في اي شارع ووووو الين يتم توقيعها من قبل الطرفين وهذه هي الاستماره ( وجه وقفا ) وبعدين يقول لك تعال يوم كذا كذا علشان يكشف المهندس على المحل انت قوله إن شاء الله واتركه وروح على وزارة التجاره وطلع ( سجل تجاري )





رخصه محل من الامام







رخصه محل من الخلف



انتهينا من إجرائات البلديه ( البدائيه ) .. ألحين نروح على فين يا حلوين على ( وزارة التجاره ) وهذه اذا ما رحت لها من بدري يخلف الله عليك يعني الساعه 7 حكم وانت محضر عند حق الي يوزع الارقام عاد ما ادري كيف نظام كل مدينه هم مثلنا ولا كيف 

المهم روح وقول للموظف انا جديد اول مره اجي هنا وابي افتح مؤسسة مقاولات راح يعطيك ورقه ( إصدار سجل تجاري ) يقول لك جيب هذه الطلبات الا وهي ( الهجوله ) ما اقول الا الله يكون بعونكم ويعطيك هذه الورقه ( وجه وقفا )

إصدار سجل تجاري

طبعا الطلبات هي :

صوره من كرت العائله القديم إذا موجود تخلص امورك بسرعه اما إذا ما عندك راح يعطيك ورقه موجهه إلى إدارة الاحوال المدنيه وتروح تطلع فيها برنت هذا طبعا إلي معاه كرت العائله الجديد اما القديم يا حليله ما يتعب ابد ههههههههه ليتني تزوجت من زمان المهم وبعد ما تخلص من الاحوال المدنيه وتجيب برنت إثبات المهنه ترجع لوزارة التجاره وتروح عند مندوب الغرفه التجاريه وتعطيه نسخه من الاوراق وهي ما يلي :

صوره من طلب تسجيل لمؤسسة فرديه مركز رئيسي او فرعي مثل الصوره الي ارفقتها لكم 

صوره من عقد الاجار + صوره من بطاقه الاحوال + صوره البرنت إلي اخذته من الاحوال 

وتقدمه له وراح يعطيك ورقه تعبي فيها بياناتك واسم المؤسسة وووو إلخ وتجيب معك صوره شخصيه ملونه واحده فقط لو عندك قديمه جيبها واذا ما عندك ( يمقن يمشونك ويمقن لا ) على حسب اسلوبك معاه ( الدعوه صارت مظاهر ) المهم خليك ريلاكس ومروق المنقى لان الصبر والعزيمه والنجاح إلي فيك راح تطيح يوم تشوف الطلبات والهجوله إلي تخليك تكره اليوم إلي قدمت فيه على مؤسسة ولكن خلك رايق واعتبرها تمشيه وحاجه من باب المعرفه فقط لا غير ( لا يكثر ) بعد ما تعبي بياناتك وتعطيه النسخ والصور إلي قلت لك عليها راح تحصله يطقطق بالكمبيوتر ويلعب بالاوراق ( مدري وش يسوي ) ويقول لك بسم الله هات القروش ههههههههههه عاد هذه لازم تحط في بالك اشتراك سنه مثل ما انا سويت ( 800 ) ريال و ( 50 ) ريال لزوم الشهاده والله كلها كلام فاضي بس يبون فلوس وراح تلاحظون ها الشي بعدين وهذه صوره تبين لكم ما هي هذه الاوراق :

وبعد ما تستلمها  راح يختم لك على ورقه طلب التسجيل بأنك دفعت القروش وانهيت موضوعك مع غرفه مكه وهذه صوره تبين الختم ( امحق من ختم )

وبعد ما تخلص من هذه تروح على الغرفه التجاريه ( وزاره التجاره ) وتقدم له الاوراق نفسها وهي :

 ( تخلص امورك بيوم واحد إذا اوراقك جاهزه )

طلب التسجيل + عقد الاجار + صوره الاحوال + برنت إثبات المهنه + اوراق غرفه مكه إلي دفعت فيها قروش 

وياخذ الموظف منك الملف الاخضر العلاقي مرفق فيه الصور الي خبرتكم فيها ويعطيك ورقه وهي آخر ورقه لكي تحصل على السجل التجاري وقيمتها 200 ريال فقط لا غير هذه رسوم تسجيل مؤسسة فرديه جديده 

ملاحظة هامه : 850 هذه كاش اما 200 هذه لازم تكون في بطاقه صرافه لانهم راح يسحبونها بواسطه  جهاز الشبكه إلي في الاسواق والمتاجر الكبيره إن شاء الله تكونو فهمتوني  وهذه صوره من ورقه 200 ريال بإمكانك تسددها عن طريق فروع الراجحي ولكن انا افضل إنهم يسحبونها بواسطه الشبكه ( ناقصين هجوله بنوك إحنا )

انا وصلت إلى هنا نروح السبت إن شاء الله وننتهي من هذه الامور ..